Niingon si Commission on Elections (COMELEC) Chairman George Erwin Garcia, nga anaa na sa 95% sa kaandam ang poll body kung hisgutan ang pagpangandam alang sa 2025 piniliay.
Matod niya nga hangtod karon, nagpadayon pa sila sa mga gipahuman ug gipatarung bisan og usa na lang ka semana ang nahabilin sa dili pa ang piniliay.
Dugang ni COMELEC Chairman Garcia, samtang nagpadayon ang Final Testing and Sealing (FTS) karong semanaha, wala pa silay natala nga teknikal nga isyu nga nasinati sa mga sakop sa electoral board, ug walay Automated Counting Machines (ACMs) nga wala modawat og mga balota.
Samtang, ang final testing ug sealing molungtad hangtod Mayo 7.
Kalabot niini, gipaabot usab nga karong semanaha mahuman na ang pag-apod-apod sa mga balota sa nagkalain-laing dapit sa nasud sanglit sugdan na usab kini sa pag-apod-apod ngadto sa mga magtutudlo alang sa piniliay. (Bombo Irene Ardiente)
