CEBU CITY – Tun-an sa Commission on Elections in Cebu (Comelec-Cebu) ang posibilidad nga mabutang sa listahan sa mga election hotspot ang lungsod sa San Fernando.
Kini human gipatay sa wala pa mailhing mga suspetsado ang usa ka incumbent public official, ug ang iyang bana sulod sa ilahang panimalay sa maong lungsod niadtong Pebrero 13, 2022.
Matod pa ni Atty. Jerome Brillantes, ang Acting Provincial Elections Supervisor sa Comelec-Cebu, nga ang nahitabong pagpamatay sa San Fernando diin ilaha kining ilakip sa ilang hisgotan atol sa evaluation sa Election Watchlist Areas (EWAs).
Giklaro ni Brillantes nga ning puntoha, dili nila hingpit nga ma-tag ang San Fernando nga usa ka ‘area of concern’ hangtod nga dili pa mahibaw-an sa kapolisan ang resulta sa ilang imbestigasyon.
Kini human usab nga gipasaka sa kapulisan ang tulo ka posibleng motibo (negosyo, politika, ug personal) nga makapasabot sa pagpatay sa magtiayong Baringui-an.// BJR
