Gipangitaag paagi sa Kagamhanan sa Probinsya sa Bohol, nga dili mapahunong o mapasira sa buhatan sa Department of Environment and Natural Resources ang pagpamaligya sa mga tindahan nga adunay mga furniture products.
Kini human nga adunay mga wood processing furniture stores ang napasirado og napahunong sa buhatan sa DENR gumikan kay wala makasumiter sa gikinahanglang rekisitos sa pagpadayun sa mga operasyon, sama sa Wood Processing Plant Permit.
Matud ni Bohol 2nd District Provincial Board Member Jisselle Villamor, nga nakasabut siya sa bahin sa DENR nga mandato gayud sa buhatan ang pagpanalipod sa kalikupan hinungdan nga wala gayu’y mabuhat ang mga personahe niini kun dili sa pagpatuman.
Apan subay sa padayung pagsulbad sa hagit sa environmental degradation, nasuta usab sa kagamhanan nga adunay halapad nga epekto kini sa mga wood furniture producers, gumikan kay nakaapekto kini sa pagkunhod sa aspeto sa cultural heritage sa Probinsiya.
Lakip na usab niini ang primerong panginabuhian sa mga Bol-anon, nga maoy nahimong gisaligan sa mga residente og mga nagproduce niini.
Hinungdan nga usa mga lakang sa Kagamhanan sa Probinsya sa Bohol mao ang pagsusi og posibleng pag-amyendar sa maong guidelines nga nakalatid sa DENR.
Kini aron malikayan ang halapad nga epekto sa cultural heritage sa Bohol ug ang panginabuhian sa mga residente.
