Mipahayag si Commission on Elections (COMELEC) Chairman George Erwin Garcia nga ilang gisusi pag-ayo ang bag-ong accredited nga party-list organizations para sa umaabot piniliay.
Ang poll body nag-accredit lang og 42 ka mga partylist ug gisalikway ang anaa sa 200 ka mga grupo.
Matod ni COMELEC Chairman Garcia, kon wala pa gyud nila kini masusi og maayo, dili unta nila isalikway ang daghan kaayong Certificates of Nomination and Acceptance (CONA) sa mga party-list groups nga hapit unta muaabot sa 300 ang ihap.
Kini nga pamahayag nunot sa gipagawas nga pagtuon sa election watchdog nga Kontra-Daya nga 86 sa 156 ka party-list organizations (55%) nga mi-aprobar sa CONA sa poll body wala magrepresentar sa mga kabus ug marginalized.
Gipasabot usab ni Chairman Garcia nga sa nalatid sa Korte Suprema nga ilang gisunod kon party-lists ang hisgutan, nalatid nga 50% lang sa mga nominees ang gikinahanglan nga gikan sa sektor nga ilang girepresentahan ug ang katunga mahimong dili na bahin sa maong sektor.
Matod niya nga nalatid usab sa balaod nga kadto lamang adunay proven advocacy alang sa maong sektor ang gikinahanglan nga modagan.
Sa pagkakaron, adunay 155 ka mga party-list nga organisasyon ang nagtigi karong piniliay alang sa 63 ka mga puwesto sa kongreso diin 113 niini ang kasamtangan nga party-list ug 42 lang niini ang bag-ong accredited.
Mao kini ang pinakaubos nga party-list groups numbers nga magtigi sa eleksiyon 2025.
