Malipayon nga mensahe ang gipaambit ni Dr. Rene Josef Bullecer kinsa bise-president sa Commission of the Laity sa Archdiocese of Cebu sa gipahigayon sa Bombo Radyo Philippines sa pagsibya og Oratio Imperata atol sa mga kakulian sa mga Pilipinong sundalo sa West Philippine Sea.
Subay sa mga panghitabo nga niadtong Hunyo 17 adunay sundalong Pilipino ang naputlan sa iyang tudlo human sa pagpanghasi sa mga Chinese Coast Guards ug People’s Liberation Army-Navy sa mga barkong Pilipino nga nakahinungdan pud sa pagkaguba sa pipila ka mga ekipo sa nasudnong kasundalohan.
Matod pa ni Dr Bullecer, nga isip ang Pilipinas nga adunay 90 porsyento sa tibuok populasyon niini nga mga Romano Katoliko kay dako kining awhag aron mailikay sa kagubot ug gyera ang nasud.
Dugang pa niya nga ang lapad nga broadcast coverage sa sibyaanan nga gikan Tuguegarao sa amihanang Luzon hangtod sa General Santos City sa habagatang Mindanao kay makapukaw gayud sa kasing-kasing sa mga katoliko aron sa inadlaw nga pagpraktis sa pag-ampo sa matag katoliko.
Si Dr Bullecer usab ang usa ka tingog nga madunggan sa Bombo Radyo Cebu atol sa Daily Rosary Program niini matag alas 9:00 sa gabii.
