CEBU – Patay ang usa ka construction worker human nga gidunggab sa makadaghang higayon sa Sitio Bukid-Bukid, Barangay Pajac, dakbayan sa Lapu-Lapu.
Giila ang biktima nga si Peter Acero, 46 anyos, lumad nga taga Southern Leyte ug kasamtangan nga nagpuyo sa Purok Sampaguita, Barangay Looc, dakbayan sa Lapu-Lapu.
Gisaysay ni Police Major Jaypee Dagami, ang hepe sa LLCPO Station 2, nga duha pa lang ka semana nga nagtrabaho sa construction site ang biktima ug wala kini gikatahong naka-away o nakalalis sa trabaho-an, gani higulagway pa kini sa mga kauban nga usa ka maayong tawo, apan giingong mag-maoy lang kung maka-inom.
Matud ni Dagami nga nakit-an pa kini sa usa sa iyahang mga kauban nga nag-inusarang nag-inom ug ilimnong makahubog niadtong Hunyo 22, pasado alas 9 sa gabii ug dayung nananghid nga mo uli.
Wala na’y laing detalya nga nakuha gikan sa paglakaw niini, apan giingong ang lugar kung diin napalgan nang patay ang biktima kay sagad magbinuntagay ug tambay ang mga batan-on.
Sa pagkakarun, padayon pa nga gisuta sa kapulisan ang motibo sa krimen, ingon man ang pag-ila sa suspek.
