Gidala sa ospital ang kontraktor nga si Pacifico “Curlee” Discaya, usa sa mga personalidad nga nalambigit sa iskandalo sa flood control project, gikumpirmar kini sa iyang abogado niadtong Huwebes.
Sa usa ka pamahayag, ang abogado ni Discaya nga si Cornelio Samaniego III, miingon nga ang iyang kliyente nakasinati og lain-laing mga sakit.
Gikumpirmar usab ni Senate President Vicente “Tito” Sotto III nga si Discaya gipailalom sa MRI test alang sa frozen shoulder.
Sumala ni Sotto, mubo ra ang pagpabilin ni Discaya sa ospital, busa gibalik dayon siya sa detention facility sa Senado human sa eksaminasyon.
Kahinumduman nga gitanggong si Discaya sa Senado sukad niadtong Setyembre 2025 human siya gi-cite in contempt kalabot sa imbestigasyon sa giingong mga anomaliya sa mga proyekto sa pagkontrol sa baha.
Si Discaya ug ang iyang asawa nga si Sarah Discaya nalambigit sa daghang mga construction firm nga naghupot og mga kontrata sa gobyerno, lakip ang daghang mga proyekto nga giimbestigahan tungod sa giingong mga iregularidad.
Samtang, si Sarah Discaya nakabalhog na sa Lapu-Lapu City Jail.
