CEBU CITY — Nisaka pag-ayo ang ihap sa mga natakdan sa coronavirus disease o COVID-19 lukop Central Visayas ngadto sa 45.
Base sa latest nga report gikan sa Department of Health (DOH)-7, nadugangan og pito ang confirmed cases sa COVID-19 diin nagagikan ang unom niini sa dakbayan sa Sugbo ug laing usa gikan sa Lapu-Lapu City.
Nag-una gihapon ang dakbayan sa Sugbo nga adunay 31 ka mga confirmed cases, samtang upat na sa Lapu-Lapu City, ug nagpabilin sa duha sa Mandaue City.
Anaa gihapon sa upat ang nagpositibo sa coronavirus sa Negros Oriental, tulo sa Cebu Province, usa sa Bohol, walay kaso sa Siquijor.
Nadugangan og usa ang nag-negatibo sa COVID-19 sa lalawigan sa Sugbo human gipaubos sa repeat testing.
Anaa karon sa 23 ang nangaayo sa coronavirus samtang nagpabilin sa walo ang mga namatay.
Matud ni DOH-7 Director Dr. Jaime Bernadas nga miresulta ang pagsaka sa confirmed cases sa dakbayan sa Sugbo tungod sa subsob nga contract tracing nga gibuhat sa mga local health authorities.
