CEBU – Nagpakitabang sa kapulisan ang pangu sa City of Talisay Traffic Operations & Development Authority (CTTODA) nga si Jonathan “Joy” Tumulak tungod sa pipila ka mga motorista nga mopugos pag agi sa lugar bisan pa man ug gibadlong ug gibarikadahan na ang dalan sa Sitio Langyon sa Manipis Road sa dakbayan sa Talisay.
Kahinumdoman, nga suakd gahapong adlawa, gipasirad-an na sa otoridad ang maong dalan gumikan sa mga pagdahili sa yuta ug mga bato dala sa sunod-sunod nga mga pag-uwan.
Gi-awhag ang mga motorista sa pagpangita og laing dalan aron malikayan ang disgrasya apan sukwahi kini sa mga nanggawsa nga hulagway karong adlaw kung diin aduna pipila ka mga motorista nga nagmagahi ug ni-agi bisan paman sa katag-as sa paril o ali nga giali sa dalan.
Nanawagan nalang si Tumulak sa kapulisan aron matabangan ang ilahang sakop sa pagbantay sa maong dalan tungod dili mapugngan nga aduna gyuy magpabadlong.
Subli kining ni-awhag nga dili lang magpabadlong ug mosunod sa pahimangno sa otoridad gumikan alang lang gihapon kini sa kaluwasan sa tanan.
