Posibleng adunay “sealed” o kompidensiyal nga warrant of arrest nga giisyu ang International Criminal Court (ICC) batok kang Senador Ronald “Bato” dela Rosa bisan pa sa kakulang sa publiko nga kumpirmasyon gikan sa internasyonal nga korte, sumala kang Atty. Rameses Victorious Gatchalian Villagonzalo, usa ka ICC-accredited lawyer.
Gipasabot ni Villagonzalo nga gi-amendahan na sa ICC ang ilang procedural regulations aron tugotan ang mga aplikasyon alang sa arrest warrants nga mahimong “under seal” o sekreto hangtod kini maipatuman sa mga otoridad o international law enforcement agencies sama sa Interpol.
Matud sa abogado, posible nga pinaagi sa electronic transmission ipadala ang maong warrant ngadto sa Interpol o sa mga law enforcement agencies sa nasud diin anaa ang subject sa pag-aresto, susama sa mga mekanismo nga gigamit sa ubang high-profile ICC cases. Dugang niya nga ang kakulang sa public disclosure dili pasabot nga walay warrant nga giisyu.
Gipasiugda usab ni Villagonzalo nga sa ilalom sa balaod sa Pilipinas, wala pay lokal nga warrant of arrest nga giisyu batok kang Dela Rosa, busa dili pa siya mahimong “fugitive” o pugante sulod sa nasud. Apan lahi ang posibleng legal nga epekto niini sa international level tungod sa hurisdiksyon sa ICC ug sa international enforcement procedures nga mahimong gamiton sa korte.
Matud pa niya, adunay diskresyon ang gobyerno sa Pilipinas kon motuman ba o dili sa usa ka international warrant depende sa polisiya sa administrasyon ug sa lebel sa kooperasyon niini sa international law enforcement bodies sama sa Interpol.
Gibutyag usab sa abogado nga adunay daghang legal remedies nga mahimong gamiton sa kampo ni Dela Rosa aron kuwestiyonon o mapugngan ang implementasyon sa posibleng ICC warrant, lakip na ang pagdangop sa Korte Suprema, pagpangayo og temporary restraining order (TRO), ug paggamit sa extradition-related legal remedies.
Nagpadayon ang diskusyon ug espekulasyon sa publiko human sa mga taho nga adunay confidential o “under seal” nga arrest warrant nga posibleng giisyu sa ICC batok sa senador may kalabotan sa imbestigasyon sa giyera kontra droga sa miaging administrasyon.
