Mopatuman ang Department of Agriculture (DA) og suggested retail price (SRP) nga P53 kada kilo para sa lokal nga bugas isip giya sa mga konsumidor.
Sumala ni Agriculture Secretary Francisco Tiu Laurel Jr., ang DA ug ang mga stakeholder sa bugas nakaabot og kasabutan aron balansehon ang kita sa mga mag-uuma ug ang affordability sa mga konsumidor.
Giklaro sa kalihim nga dili kini price ceiling apan giya lamang para sa mga konsumidor sa saktong presyo sa lokal nga bugas.
Sa samang higayon, ang P50 kada kilo nga price cap para sa imported nga five-porsyento nga broken rice magpabilin sulod sa 30 ka adlaw sugod Mayo 15.
Gipasabot sa kalihim nga ang P50 nga price cap gibase sa landed import cost nga P37 ngadto sa P38 kada kilo.
Sumala ni Laurel, aduna pa’y igong allowance para sa logistics, spoilage, ug makatarunganong ganansya para sa mga importer, negosyante, ug retailer.
Dugang niya nga ang hingpit nga pagpatuman sa imported rice price cap magsugod sa sunod semana aron mahatagan ang mga retailer ug konsumidor og igong panahon sa pag-adjust.
