Gipahibalo sa Department of Agriculture nga apil ang mga minimum wage earners sa P20 nga programa sa bugas sa gobyerno.
Gihimo sa ahensya ang pagpahibalo dungan sa paglusad sa roll out sa programa sa DA, sa pakigtambayayong sa DOLE sa tibuok nasud.
Kini nga lakang sa DA ug DOLE agi’g pagsunod sa direktiba ni Presidente Ferdinand Marcos Jr. sa pagpagaan sa pinansyal nga palas-anon sa mga Pilipino nga anaa sa mga huyang nga sektor sa katilingban.
Gipasiugda ni Agriculture Secretary Francisco Tiu Laurel Jr. nga padayon ang gihimo nga lakang sa buhatan aron makabaton og barato nga pagkaon ang nasud.
Gituohan usab ni Labor Secretary Bienvenido Laguesma nga dako kini nga tabang sa mga minimum wage earners ilabina nga dili paigo ang ilang kita.
Basi sa datus sa ahensya, mokabat sa 120,000 ka mga trabahante sa nasud nga adunay minimum wage earners gikan sa kapin 500 ka mga establisemento hinungdan nga dako na kini og kaginhawaan nga nalakip sila sa maong programa.
