Padayon ang Department of Agriculture (DA) sa pakig-alayon sa nagkalain-laing mga nasud aron masiguro ang igong suplay sa mga fertilizers sa Pilipinas, taliwala sa nagpadayon nga krisis sa Middle East nga nakaapekto sa global nga merkado.
Sumala ni Agriculture Secretary Francisco Tiu Laurel Jr. niadtong Miyerkules, ang presyo sa abono nidoble, diin misaka ngadto sa $800 gikan sa miaging $400 kada tonelada.
Tungod niini, ang gobyerno nakigsulti na sa mga nasud sama sa India, Russia, ug Belarus aron masiguro ang alternatibong suplay alang sa mga Pilipinong mag-uuma.
Bisan pa niini, gikumpirmar ni Tiu Laurel nga ang China walay plano nga mohunong sa pag-eksport sa abono sa Pilipinas.
Kini human sa iyang miting uban ni Chinese Ambassador to the Philippines Jing Quan niadtong Martes aron hisgutan ang kooperasyon sa agrikultura.
Gihimakak sa kalihim ang mga taho nga ang China mopatuman og export freeze aron unahon ang kaugalingon nga mga panginahanglan.
Samtang, si Presidente Ferdinand Bongbong Marcos Jr. naghatag usab og pasalig nga ang suplay sa mga batakang palaliton ug abono sa nasud nagpabilin nga igo.
