CARCAR CITY, CEBU-Nigahin og P4.7 milyones nga ayuda ang City Government sa mga ‘Backyard hog raisers sa Carcar City, Cebu kinsang mga binuhing baboy namatay sa African swine fever (ASF).
Gitino ni Mayor Mario Patricio Barcenas nga kini maoy paagi sa Siyudad sa pagtabang sa mga backyard hog raiers nga naapektuhan sa kataas sa ASF.
Ang pag-apod-apod sa hinabang pinansyal gihimo niadtong Mayo 17, diin 470 ka apektadong backyard hog raiers ang nakadawat ug P10,000 matag panimalay.
Matod ni Barcenas nga ila ra gi-reimburse ang mga indibidwal nga adunay labing taas nga 20 ka baboy, Kon sila adunay labaw pa niana, sila dili isipon nga backyard hog farmers.
Nasayran nga ang backyard hog raisers gikan sa tanang 15 ka barangay sa dakbayan nga naglakip sa Bolinawan, Buenavista, Calidngan, Can-asujan, Guadalupe, Liburon, Napo, Ocana, Perrelos, Poblacion I, Poblacion II, Poblacion III, Tuyom, Valencia ug Valladolid.
