Giila isip modelo sa kampanya batok sa ginadiling droga ang dakbayan sa Mandaue atol sa pagbisita sa Quezon City Anti-Drug Abuse Advisory Council (QCADAAC) sa syudad alang sa usa ka benchmarking activity.
Gipangulohan ang grupo ni Action Officer Christine Pascua diin mainitong gi-abi-abi kini nila Mandaue City Substance Abuse and Mental Health Services Office (SAMSHO) Head Atty. Ebenezer Daryl Manzano, City Councilors Ting Sol Cabahug Jr., Eugene Andaya, Raul Kevin Cabahug, Atty. Joel Seno, Andreo “Anjong” Ouano-Icalina ug Former Vice-Mayor Nerissa Soon-Ruiz.
Matod pa ni Mandaue City Mayor Thadeo Jovito “Jonkie” Ouano nga ang pagbisita sa mga delegado gikan Quezon City kay naghulagway sa hiniusang pasalig sa pagtukod og komunidad nga luwas ug drug-free.
Dugang pa nga ang ilang tumong kay nagkinahanglan sa giya sa pagkahiusa, compassion, ug padayong inobasyon.
Gipresentar sa kagamhanang dakbayan ang ilang mga buhatong programa sama sa community-based prevention, rehabilitation, ug reintegration nga gpatuman sa matag barangay pinaagi sa aktibong kusog sa Barangay Anti-Drug Abuse Councils (BADACs).
Mapasigarbohon usab nga gipakita sa mga bisita niini nga sa 27 ka mga barangay sa Mandaue City kay 22 niini o kapin 80% ang gidekalrang drug-cleared sa Regional Oversight Committee on Barangay Drug Clearing, subay sa pamalaod sa Dangerous Drugs Board.
Nagtimaan ang pagbisita sa pasalig sa dakbayan isip seryoso sa kampanya kontra illegal nga droga ug padayong nagserbisyo alang sa katawhan Mandauehanons.
