MANDAUE CITY,CEBU- Mikontrata ang kagamhanan sa Dakbayan sa Mandaue og usa ka pribadong kompanya sa basura isip lakang sa pagsulbad sa nagpadayon nga problema sa basura sa dakbayan, diin magsilbi kini og transfer station sa mga basurang malata ug dili malata.
Sumala ni Mandaue City Mayor Thadeo “Jonkie” Ouano, aduna na silay gikontrata nga pribadong kompanya nga magsilbing transfer station alang sa tanang basura—lakip na ang malata ug dili malata. Ang mga basurang dili na maproseso ihatod na ngadto sa Asian Energy.
Sumala pa sa mayor, ang sobra nga basura ihatod ngadto sa Asian Energy sa Barangay Polog, Consolacion, pinaagi sa pribadong haulers sa maong kompanya ug dili na gamiton ang mga trak sa barangay.
Gipatin-aw usab sa opisyal nga wala pa kini una nahisgutan sa miaging mga adlaw tungod kay wala pay direktang kontrata ang dakbayan sa pribadong kompanya, hinunoa transfer permit lamang ang anaa sa kagamhanan sa dakbayan kaniadto.
Dugang pa, naningkamot usab ang kagamhanan sa Mandaue og mga alternatibong paagi sa pagdumala sa basura, ilabi na kung mapuno ang landfill sa Barangay Polog, nga karon nag-atubang og problema sa kadaghang basurang gilabay niini.
