Nagpahigayon ang Dakbayan sa Mandaue og Pre-Disaster Risk Assessment (PDRA) ug nagmando og pre-emptive evacuation niadtong Lunes, Nobyembre 24, para sa mga residente nga nagpuyo duol sa mga suba sa Butuanon ug Mahiga samtang ang Tropical Depression Verbena nagbutang sa siyudad ubos sa Signal No. 1.
Gimandoan ang mga kapitan sa barangay nga magsugod sa mga operasyon sa pagbakwit sa ilang mga lugar, human sa mga diskusyon atol sa miting sa PDRA bahin sa mga pagpangandam ug safety measures nga gipatuman.
Sumala ni City Social Welfare Services (CSWS) Focal Person Glydiza Gochoco, ang mga grupo andam na sa pag-apod-apod sa mga food packs sa mga barangay kung gikinahanglan atol sa pagbakwit.
Gipangulohan ni Mayor Jonkie Ouano ang meeting ug gitambongan ni CDRRMO Head Buddy Ybañez, ubang mga department head, ug mga kapitan sa barangay aron masiguro ang kahandaan sa siyudad batok sa nagsingabot nga bagyo.
