CEBU – Gikatakdang mopirma og Memorandum of Agreement (MOA) ang kagamhanan sa dakbayan sa Sugbo uban sa Cybercrime Investigation and Coordinating Center (CICC) aron masiguro ang maayong cyber risk management ug digital governance.
Kini human nihatag og pagtugot ang Cebu City Council kang Mayor Michael Rama nga mopirma og MOA uban ni ICC Executive Director Cezar Mancao II.
Sa usa ka pamahayag, gikutlo ni Cebu City Councilor Philip Zafra, ang Committee head sa City Council’s committee on public order , nga “very significant” ang pakigtambayayong sa dakbayan sa CICC tungod sa pipila ka human trafficking activities dinhi sa Sugbo.
Kung kahinumduman nga niadtong Hulyo 13, 2022, gironda sa lokal nga awtoridad ang usa ka cybersex den sa Barangay Luz ug giluwas ang pito ka menor de edad ug gidakop ang usa ka babaye nga gituohan nga usa ka human trafficker.
Ang CICC usa ka inter-agency body, nga nakabase sa Quezon City, nga gimugna pinaagi sa Republic Act No. 10175 o ang Cybercrime Prevention Act of 2012.
Ubos sa MOA, mohimo ang kagamhanan sa dakbayan ug ang CICC og intelligence, investigations training ug capacity building nga may kalabutan sa cybercrime prevention, suppression, ug prosecution.
