CEBU CITY-Mogasto ang Dakbayan sa Sugbo og P10.6 milyones alang sa pagsaulog sa Independence Day karung Hunyo 12, 2023.
Giaprobahan sa City Council ang budget pinaagi sa resolusyon nga gisang-at ni Konsehal Noel Wenceslao, chairman sa committee on budget, atol sa regular session niadtong Miyerkules, Mayo 24, 2023.
Sila si Konsehal Nestor Archival, Joy Augustus Young ug Mary Ann Delos Santos sa oposisyon nag-abstain sa pagbotar sa resolusyon nga nagtugot sa mayoriya sa pag-aprobar sa kinatibuk-ang P10,597,000 nga budget.
Ang budget maoy magpundo sa 19 ka adlaw nga selebrasyon nga giandam sa City Government alang sa Independence Day.
Matod ni Archival nga “sobra ka dako” ang maong kantidad ug nangutana siya kon aduna bay paagi sa pagsaulog sa anibersaryo nga mas gamay ang budget.
Dugang pa, nga suportado niya ang pagsaulog sa Independence Day, apan maayong gamiton ang disenteng budget.
Nasayran nga ang Cebu City Hall magsugod sa pagsaulog sa Independence Day sa Lunes, Mayo 29, ug matapos sa Hunyo 16.
