Gilauman ang dakong pagsaka sa presyo sa petroleum products sunod semana tungod sa nagkakusog nga tensyon sa Middle East.
Base sa banabana sa mga tinubdan sa industriya sa lana, mosaka ang presyo sa diesel og P9.50 hangtod P10.50 kada litro, samtang ang gasolina mosaka og P3.50 hangtod P4.50 kada litro.
Sumala sa mga eksperto, ang pagsaka sa presyo resulta sa nagkataas nga geopolitical risk subay sa mga insidente sa Strait of Hormuz, lakip ang pagpangatake sa Iran sa mga komersyal nga barko ug ang pagbalos sa militar sa Estados Unidos.
Nakatampo usab ang pagkunhod sa barkong nag-agi sa maong ruta, ang pagbabag sa US sa mga pantalan sa Iran, ug ang kakuwang sa eksport sa diesel gikan sa Russia.
Samtang, gipahibalo ni Presidente Ferdinand “Bongbong” Marcos Jr. nga gipalapdan sa gobyerno ang United Package for Livelihoods, Industry, Food, and Transport (UPLIFT) aron makatabang sa mga maapektuhan sa pagsaka sa presyo sa lana.
Ubos sa programa, gibanabana nga 7.5 ka milyon ka panimalay, o kapin 37.5 ka milyon ka Pilipino, ang makadawat og pinansyal nga tabang.
Lakip niini ang 3.5 ka milyon ka benepisyaryo sa Pantawid Pamilyang Pilipino Program (4Ps) ug Walang Gutom Program nga makadawat og dugang ayuda nga moabot hangtod P2,000.
