Nakaapod-apod na ang Department of Social Welfare and Development (DSWD) og kapin sa P7.3 bilyon nga kantidad sa cash aid ngadto sa kapin sa 1.4 milyon nga mga drayber sa public utility vehicle (PUV) sa tibuok nasud.
Sumala ni Asst. Secretary ug tigpamaba sa DSWD nga si Irene Dumlao, ang pag-apod-apod sa tabang nagpadayon alang sa tanang rehistrado ug lehitimong mga drayber nga nalakip sa mga validated list gikan sa Transport Network Companies (TNCs).
Dugang pa sa opisyal nga ang payout alang sa mga drayber sa jeepney ug tricycle sa gawas sa National Capital Region (NCR) nagpadayon pa, samtang ang mga drayber sa PUV sa NCR adunay gitakdang iskedyul alang sa usa ka espesyal nga payout, lakip ang mga drayber sa Transport Network Vehicle Service, mga drayber sa motorcycle taxi, ug mga service delivery riders.
Kini nga programa kabahin sa Unified Package for Livelihoods, Industry, Food, and Transport framework, nga nagtumong sa pagtabang sa sektor sa transportasyon nga grabeng naapektuhan sa pagsaka sa presyo sa lana ug geopolitical tensions sa Middle East.
Ang cash aid giapod-apod pinaagi sa Assistance to Individuals in Crisis Situation (AICS) program sa DSWD, nga naghatag dayon og pinansyal nga suporta sa mga drayber sa PUV kansang panginabuhi naapektuhan.
