CENTRAL VISAYAS- Gibahin sa tulo ka grupo ang mga kwalipikadong panimalay nga makadawat og tabang pinansyal ubos sa Unified Package for Livelihood, Infrastructure, Food, and Transport (UPLIFT) Program sa gobyerno, isip tubag sa epekto sa nagpadayong krisis sa Middle East.
Kini ang gipasabot ni Leopoldo Alfanta Jr., Chief Statistical Analyst sa Philippine Statistics Authority (PSA)-7, atol sa iyang pakighinabi sa Bombo News Team bahin sa mga kwalipikasyon ug mekanismo sa pagpili sa mga benepisyaryo sa maong programa.
Matod ni Alfanta, ang UPLIFT Program usa ka inisyatibo sa administrasyon ni Pangulong Ferdinand Marcos Jr. aron maminusan ang epekto sa nagpadayong krisis sa Middle East, nga nahimong hinungdan sa pagsaka sa presyo sa lana ug sa mga batakang palaliton.
Gilauman nga mokabat sa 7.5 milyon ka mga panimalay sa tibuok nasud ang makabenepisyo sa programa, nga gibahin sa tulo ka pangunang grupo.
Kung diin, ang Group 1, nga adunay 3.5 milyon ka panimalay, naglangkob sa mga benepisyaryo sa Pantawid Pamilyang Pilipino Program (4Ps) ug Walang Gutom Program sa Department of Social Welfare and Development (DSWD). Makadawat sila og one-time cash assistance nga ₱2,000, diin nagsugod na ang pagpanghatag karong Hulyo ug magpadayon hangtod sa Agosto.
Ang Group 2, nga adunay 2.5 milyon ka panimalay, naglangkob sa mga poor ug near-poor households nga giila pinaagi sa Community-Based Monitoring System (CBMS) nga gipahigayon sa PSA niadtong 2024. Makadawat sila og ₱2,000 matag bulan gikan sa Hulyo hangtod Disyembre, o kinatibuk-ang ₱12,000. Ang unang ayuda ipanghatag pinaagi sa physical payout, samtang ang mosunod nga mga ayuda i-credit na sa ilang digital wallet o bank account.
Samtang, ang Group 3, nga adunay 1.5 milyon ka panimalay, naglangkob sa mga low-income households nga giila sa Social Security System (SSS). Kini mao ang mga empleyado nga adunay monthly salary credit nga ₱20,000 paubos ug adunay labing menos usa ka kontribusyon sa SSS sulod sa gitakdang qualification period. Ang ilang ayuda awtomatikong i-credit sa ilang mga bank account.
Giklaro usab sa PSA nga ang pag-ila sa mga benepisyaryo gibase sa siyentipiko ug opisyal nga datos gikan sa DSWD, CBMS-PSA ug SSS aron masiguro nga ang tabang sa gobyerno mahatag ngadto sa mga pamilyang labing nagkinahanglan.
