CEBU CITY – Dismayado ang pipila ka mga beneficiaries sa Dasig Sugbo cards sa ilahang gihulagway nga walay sistema nga pag-purchase niini.
Gisaysay ni Estela Sotto nga gikan pa sa dakbayan sa Carcar ug naabot sa syudad sa Sugbo ug alas 2 sa kadlawon, nga upat na kini kahigayon nga nagbalik-balik sa syudad apan dili gayud makaabot bisan pa man sa pag-sayo sa linya gumikan kay adunay mga mag-insert.
Matud pa, kung kinsa ang na-ulahi ug abot, giingong mao na’y ma-una ug sulod sa mall.
Sigon ni Sotto nga mas maayo nga cash na lang ang ihatag arun nga mag-iyahay na lang ang mga tawo ug pamalit.
Nasagmuyo usab si John Lester Dumahil nga gikan pa sa dakbayan sa Talisay gumikan sa giingong pabor-pabor nga pagpasulod sa mga benepisyaryo.
Gibutyag ni Dumahil nga tag-50 ka mga tawo ang pasudlon apan wala’y priority number nga ihatag hinungdan nga adunay mu-insert sa linya.
Gani, pasangil pa niini nga adunay mga staff ang mall nga adunay kaila sa mga naglinya ug mao ang unahon sa pagpasulod.
