Death toll sa linog sa Cebu, misaka na sa 79 – NDRRMC

Paglabay sa duha ka semana, nisaka og tulo ang ihap sa nangamatay sa kusog nga 6.9 magnitude nga linog nga niigo sa Bogo City, Cebu niadtong Septiyembre 30.

Matod sa National Disaster Risk Reduction and Management Council (NDRRMC), nisaka na sa 79 ang kinatibuk-ang ihap sa mga nangamatay gumikan sa linog.

Moabot usab sa 559 ka mga indibidwal ang natala usab nga naangol samtang walay gikatahong missing.

Sa pagkakaron, adunay 5,000 ka mga tawo ang nagpabilin sa 17 ka evacuation centers samtang ang uban temporaryo pa nga nagpabilin sa ubang mga lugar.

Nagpabiling ubos sa state of calamity ang tibuok lalawigan sa Sugbo tungod sa kadako sa kadaot nga gibilin sa kusog nga linog.