Niabot na sa 26 ang ihap sa nangamatay nga natala sa kadaot nga gipahinabo sa bagyong Mirasol, Nando, ug Opong, sumala sa taho sa National Disaster Risk Reduction and Management Council (NDRRMC).
Sa ilang situational report, upat sa mga nangamatay ang natala sa Cordillera Administrative Region (CAR), samtang 22 ang giproseso alang sa validation sa ubang rehiyon lakip na ang Cagayan Valley, Central Luzon, Bicol, Central Visayas, ug Eastern Visayas.
33 usab ang naangol, diin 14 niini ang padayon pa nga gi-validate, ug 14 ang missing.
Samtang, kapin sa 738,000 ka pamilya o halos 2.8 milyones ka indibidwal ang naapektuhan sa niaging mga bagyo, diin kapin sa 46,000 ka pamilya ang nagpabilin sa 2,680 ka evacuation centers, ug kapin sa 31,000 ka pamilya ang nakadawat na og hinabang gawas sa evacuation centers.
Subay niini, gikabutyag usab sa NDRRMC ang ang Bicol mao ang nanguna sa halapad nga epekto sa bagyo, ilabi na sa Masbate nga mao ang dapit nga labing gikuso-kuso sa bagyong Opong niadtong Biyernes, Setyembre 26.
Gidugang niini nga niabot sa P864 milyones ang kadaot sa imprastraktura nga gibilin sa nangaging mga bagyo sa nagkadaiyang rehiyon, samtang ang kadaot sa agrikultura niabot sa kapin sa P1 bilyon.
