Gipasabot ni Atty. Michael Wesley Poa nga “Ad cautelam” o “Out of abundance of caution” ang pag-apil sa depensa sa kasamtangang sesyon ug sa oral arguments sa sunod semana kalabot sa impeachment trial ni Bise Presidente Sara Duterte.
Matod ni Poa, tuyo nilang mopadayag og mga espesipikong punto atol sa oral arguments ug gusto nilang ma-rekord sa opisyal nga talaan ang ilang baruganan aron mapanalipdan ang mga katungod ug interes sa ilang kliyente.
Gihisgutan usab ni Poa nga posibleng moabot kini nga kaso sa Korte Suprema, ilabi na kung makita sa depensa nga gilapas na ang mga katungod sa Bise Presidente isip respondent sa impeachment case.
Ingon man nga gihatagan og gibug-aton ni Atty. Poa nga wala nila gisalikway ang posibilidad nga dad-on sa Korte Suprema ang mga isyu nga ilang giisip nga gikinahanglang kuwestiyonon.
