Cebu City-Dako ang pagtuo ni kanhi Senador ug amahan sa Local Government Code, Aquilino Nene Pimentel Jr nga limitahan lamang sa mga magbabalaod ang implementasyon sa Martial Law nga gideklarar ni Presidente Rodrigo Duterte sa tibuok Mindanao.
Matud ni Pimentel nga sa pagahimuong joint session sa Kongreso ug Senado, mamahimo nga suportahan sa hingpit, limitahan o ibasura ang deklarasyon sa Martial Law sa Presidente. Gibutyag niini nga bisan pa man og halos kaalyado ni Dutrte ang kadaghanan sa mga magbabalaod, aduna gihapoy mahitabo nga debate sa joint session hilabi na og mahisgutan ang epekto niini sa nasud.
Gipasabot ni Pimentel nga makaapekto gayud sa ekonomiya sa Mindanao ug sa tibuok Pilipinas ang nahimong desisyon sa Presidente sa pagpapas sa mga teroristang grupo nga nagdala og kagubot karon sa Marawi City maong angayang ikonsidera sa Presidente ang mga implikasyon sa iyang mga lakang. Gipahayag usab sa kanhi sa senador nga sa iyang kaugalingong panglataw, mas maayo kung e limit na lamang ngadto sa mga lugar nga dunay kagubot ang implementasyon sa Martial Law sama sa Marawi City ug sa Lanao del Sur aron nga dili maapektuhan ang ubang lugar sa Mindanao.
Gipasabot usab niini nga kasagarang impresyon gayud sa katawhan , basta maghisgot og Martial Law mao ang gyera ug kagubot, diin matud pa nga walay negosyante ang ganahan nga mubutang og negosyo sa usa ka gubot nga lugar.
Subay niini giwhag ni Pimentel ang katawhan dili lamang ang katong mga taga Mindanao kundi lakip na ang mga taga Visayas ug Luzon nga manawagan nga limitahan lamang ang deklarasyon sa Martial Law sanglit dili lamang Mindanao ang maapektuhan sa mga implikasyon sa maong deklarasyon kundi apil na ang tibuok nasud.
