CEBU –
Adunay nahitabong komosyon sa Carbon Public Market sa dakbayan sa Sugbo sayo ning adlawa Lunes sa buntag, Hulyo 18,2022, human gisupak sa mga vendor ang paghawan sa mga stalls nga nahimutang sa Freedom Park ug nibalhin sila sa interim market nga nahimutang sa Unit II.
Hinungdan nga nakalitan ang pipila ka mga vendors sa maong lugar, gumikan kay gipakatap ang mga pulis aron mapugngan ang mga vendor nga makabalda sa clearing operations.
Kini ang gibutyag ni Winifredo Miro, ang Bise Presidente sa Carbohanong Alyansa, nga dili makatarunganon alang kanila ang gihimong dimolition, kay hilabihan kadaghan ang gipadala nga sakup sa kapulisan sa naasoy nga lugar, ug ang gusto lamang nila nga mga vendor ang “makaluwas sa Carbon” ug magpabilin ang kasamtangan nga status niini isip merkado publiko.
Gitataw usab ni Miro, nga nausab na ang templada ni Mayor Mike Rama karun nga mayor na siya, dili sama kaniadtu nga Bise Mayor pa kini, ug nanawagan kini sa mayor nga unsa nay nahitabo sa unang baruganan niini nga adunay buslot ang kontrata sa Carbon.
Nasayran nga ang Market Authority sa dakbayan niisyu niadtong Hulyo 13 og pahibalo nga nagmando sa tanang mga nagpuyo sa merkado sa pagbalhin ngadto sa interim nga merkado o sa dili pa ang Hulyo 18.
