CEBU CITY-Gidala sa usa ka pribadong tambalanan sa Mandaue City ang usa ka dentista human gisulod sa duha ka wa mailhing tawo ang iyang klinika sa Queens Road, duol sa Redemptorist Church, sa Barangay Kamputhaw, dakbayan sa Sugbo, mga alas 2 sa hapon gahapon Miyerkules, Hulyo 5, ug gilugit ang iyang mga mata gamit ang hait nga hinagiban.
Ang biktima giila nga si Dr. Charles Pactol Sia, 41, taga dakbayan sa Sugbo.
Matod sa sekretarya sa dentista, kinsa nitaho sa kapolisan sa Abellana Police Station, nga adunay duha ka lalaki ang misulod sa klinika sa dentista aron ihatod ang usa ka butang.
Usa sa mga suspek nagsul-ob og itom nga jacket, samtang ang usa nagsul-ob og green, kinsa nagsul-ub ug face mask.
Apan ang suspek nga nagsuot og green nga jacket kalit nga nibunot og armas ug miadto sa kwarto sa doktor diin gioperahan ang langyaw nga pasyente.
Gigapos sa mga suspek ang mga kamot sa biktima ug ang kamot sa iyang sekretarya, ug ang usa niini gibunalan og gilugit ang mata sa biktima hangtod nga nagkadugo.
Usa ka caretaker sa duol nga establisemento niingon nga nitawag dayon sila og ambulansya dihang ilang nabantayan nga nagkadugo ang mga mata ni Sia.
Sa kasamtangan, ang Abellana Police Station padayon pa nga nagpahigayon og imbestigasyon ug gisusi ang CCTV footage sa lugar ug mga kasikbit nga establisemento aron mailhan ang mga sad-an.
Nasayran, nga ang klinika sa doktor sa nakalabay adunay guwardiya nga nag-duty panahon sa adlaw, apan tungod sa pagpangawat sa palibot, gibalhin siya sa night shift.
