CEBU CITY-Nanghinaot ang Department of Veterinary Medicine and Fisheries (DVMF) nga subling mag-abli og kaugalingong ihawan ang Cebu City Hall, human nga nasuta nga sagad sa mga pribadong ihawan nakalapas sa mga lagda nga gilatid sa Sanitary Code.
Kini ang gitino ni Dr. Jessica Maribojoc, ang pangu sa DVMF, nga kasamtangang adunay 19 ka pribadong ihawan sa dakbayan hain 16 niini sa baboy samtang ang tulo sa manok.
Sa maong mga ihawan, 15 ang rehistrado sa City Hall, nga nagpasabot nga ang DVMF maoy mosiguro sa kalimpyo sa ihawan ug sa mga pamaagi niini.
Sumala ni Maribojoc, nasuta sa ilang pagsusi sa mga ihawan nga sagad kanila wala makasunod sa unsay sukdanan ug sumbanan nga mga pamaagi sa pag-ihaw ug pag-andam sa karne, nga peligroso ngadto sa mga konsumidor.
Gitumbok niini nga naay uban nga wala misunod sa lagda, ug ang uban nag-ihaw lang gihapon sa salug, hinungdan nga adunay uban nga for closure, ug ang uban for improvement.
Masaligon ang DVMF nga kung aduna nay kaugalingong ihawan ang City Hall mas masiguro nila nga limpyo ang karne nga gikan sa maong ihawan.
