Gipasiugda ni Education Secretary Sonny Angara nga gawas sa pisikal nga mga lakang sa seguridad sama sa CCTV, mga koral, ug metal detector, mas importante gihapon ang pagbaton og lig-on nga relasyon sulod sa komunidad sa eskwelahan.
Matod ni Angara, importante ang kanunay nga pakig-uban ug maayong pag-ila sa mga estudyante aron masabtan ug mamonitor ang ilang kahimtang, ilabi na kay ang eskwelahan nagsilbing ikaduhang panimalay sa mga batan-on.
Gipahayag usab niya nga ang gobyerno ug mga eskwelahan nagpadayon sa pakig-istorya sa mga ginikanan aron mahatagan ang mga estudyante sa gikinahanglang suporta, bisan pa man nga boluntaryo pa kini sa pagkakaron.
Usa sa mga dagkong hagit, sumala ni Angara, mao ang pag-abot ug paghatag og suporta sa tanang estudyante, ilabi na kadtong nag-atubang og mga problema sa pamilya o nanginahanglan og counseling.
Giila usab niya nga kulang pa gihapon ang mga guidance counselor sa mga eskwelahan.
Tungod niini, nanawagan si Angara alang sa usa ka “bayanihan approach,” diin ang komunidad, mga ginikanan, magtutudlo, ug uban pang sektor magtinabangay aron mapalambo ang kaayohan ug kaluwasan sa mga batan-on.
