Maghulat ug morespeto si Senate Committee on Women Chairperson, Sen. Risa Hontiveros sa desisyon sa Korte kalabot sa pagtambong sa lider sa Kingdom of Jesus Christ (KOJC), Pastor Apollo Quiboloy sa Senate inquiry hearing.
Kahinumduman nga nipadala na og sulat ang komite ni Hontiveros ngadto sa mga korte sa Quezon City ug Pasig City nga maoy nagdumala sa mga kaso ni Quiboloy, aron personal kining makatambong sa Senate hearing nga ipahigayon karong Miyerkules, Oktubre 23, 2024.
Giinsister ni Hontiveros nga adunay standing warrant of arrest si Quiboloy sa Senado tungod sa wala pagtambong sa hearing, busa angayan nga moatubang sa Senate inquiry ang lider sa relihiyon ug atubangon ang mga resource person o ang victim-survivors sa giingong mga giabuso nga miyembro sa KOJC.
Kung kahinumduman una nang niduso ang kampo ni Quiboloy og petisyon nga dili siya tugotan nga makatambong sa imbestigasyon sa Senado diin gipasabot usab sa magbabalaod nga ‘in aid of legislation’ ang ilang gihimo nga imbestigasyon.
Matud niya nga gitumong niini nga mapalig-on ang pagsulat ug pagpatuman sa mga balaod sa nasud mahitungod sa pagpanalipod sa kababayen-an, kabataan ug mga mamumuo.
