Gimandoan ni Presidente Ferdinand Marcos Jr. ang Department of Foreign Affairs (DFA) nga makigsabot sa Iran aron masiguro ang luwas nga pag-agi sa mga barko nga nagdala og mga suplay paingon sa Pilipinas.
Matud ni Palace Press Officer Undersecretary Claire Castro nga gimandoan sa Presidente si DFA Secretary Theresa Lazaro nga makig-alayon sa Iranian ambassador.
Diin ang mga importanteng panagsabot gilauman nga mahitabo karong semanaha o sa sunod semana.
Dugang pa ni Castro nga ang lakang tubag sa panawagan ni Senador Sherwin Gatchalian sa ehekutibong sanga nga magpahigayon og mga high-level discussions aron masiguro ang luwas nga pag-agi sa mga barko agi sa Strait of Hormuz taliwala sa tensyon sa Middle East.
Ang direktiba sa Presidente nagtumong sa pagpugong sa bisan unsang pagkabalda sa pagdagayday sa enerhiya ug mga produkto paingon sa nasud samtang nagpadayon ang panagbangi sa rehiyon.
Gipasalig sa Palasyo nga ang Pilipinas ug Iran adunay maayong relasyon.
