Subling gipahinumdoman sa Department of Foreign Affairs ang mga Filipino nga likayan ang non-essential nga pagbiyahe sa Israel, Palestine ug mga silingang nasud sa Middle East tungod sa dili maayo nga sitwasyon sa seguridad sa rehiyon.
Matod sa ahensya, ang mga nasud nga angay likayan mao ang gipaubos sa Alert Level 2 o adunay mas taas nga alert level.
Ubos sa three-tier alert level system sa DFA, ang Alert Level 2 gi-isyu kung adunay tinuod nga hulga sa kinabuhi, seguridad, ug kabtangan sa mga Pilipino nga naggikan sa internal nga kagubot, pagkawalay kalig-on, o hulga sa gawas.
Lakip sa gipasabot sa DFA nga non-essential travels mao ang tourism visits, temporaryong pagpuyo uban sa mga paryente ug higala, volunteer work, sports events, kalingawan, ug susamang mga kalihokan.
Tungod niini, gipasidan-an sa DFA ang publiko batok sa bisan unsang tanyag sa mga indibidwal, organisasyon, kompanya sa mga pagbisita ug pagbiyahe sa gubot nga mga nasud sa rehiyon sa Middle East.
Kahinumduman nga unang gipataas sa DFA ang Alert Level 2 sa Israel niadtong Oktubre sa miaging tuig human sa pag-atake sa mga sakop sa Hamas nga mipatay og kapin sa 1,200 ka mga tawo ug ang pagdagit sa kapin sa 200 ka mga Israeli ug ubang mga lungsuranon.
