CEBU – Di mominos sa P5 milyones nga balor sa ecstasy tablets ang nasakmit gikan sa usa ka 30 anyos nga lalaki atol sa controlled delivery operation nga gipahigayon sa Barangay Pasil, dakbayan sa Sugbo, gahapong adlawa, Lunes sa hapon, Hulyo 18, 2022.
Nasikop sa mga otoridad ang 30-anyos nga lalaki nga giilang si Lunel Padin, residente sa Barangay Suba, dakbayan sa Sugbo.
Nipahigayon niining controlled delivery operation ang Philippine Drug Enforcement Agency in Central Visayas (PDEA-7), uban sa koordinasyon sa Bureau of Customs ug Ninoy Aquino International Airport Anti-Illegal Drug Interdiction Task Group, diin ilang gimonitor ang paghatod sa usa ka pakete sa 2,984 ka ecstasy tablets sa tawo nga gipadala sa naasoyng barangay.
Matud pa ni Daryl Panulaya, ang information officer 1 sa Bureau of Customs, nga labing menos usa ka semana na nilang gisuwayan nga makigkomunikar sa suspek human naabot ang package sa NAIA niadtong Hulyo 10.
Dugang pa, nga gahapong adlawa, Hulyo 18, girespondehan sila sa suspek ug gikompirmar ang delivery nga miresulta sa pagkasikop niini, ug ang pakete sa ecstasy tablets gituohan nga gikan sa Netherlands.
Saysay pa ni Panulaya nga ang ngalan ni Padin ang gibutang isip consignee sa delivery package ug siya usab ang nakadawat niini.
Kini na ang ikaupat nga higayon nga nakadawat sila og usa ka enclosing sa ilegal nga drugas, apan karong tuiga pa lang nga adunay sama sa ingun, gumikan kay kaniadto mga gidudahang shabu ang ilang masakmit.
Samtang sa pikas ka bahin, gibutyag ni Levi Ortiz, ang PDEA-7 director, nga mao kini ang una nilang operasyon sa ecstasy.
Gumikan sa lainlain nga kolor sa mga nakumpiska nga tabletas, wala pa matino ni Ortiz kung lain-lain ba kini nga klase sa ecstasy samtang naghulat pa sa dugang nga imbestigasyon.
Butyag pa niini, nga ang Netherlands maoy nagpadala og 2,984 ka piraso sa ecstasy pinaagi sa NAI, ug kini ang unang ecstasy (seizure) sa Cebu, nga kung diin ang presyo sa ecstasy dinhi sa Sugbo, kasagarang anaa sa P2,250.
Samtang ang standard average nga presyo sa tibuok nasud sa ecstasy kay P1,700, hinungdan nga ang kinatibuk-ang kantidad sa mga butang nga nakumpiska gibana-bana nga mokabat sa labing menos P5 milyones.
