MANDAUE CITY – Dako ang pagtuo sa ‘yaya’ sa usa ka 20 anyos nga “person with special needs” nga napa-ig na kini atol sa sunog nga nahitabo sa Zamora St., Barangay Centro, dakbayan sa Mandaue.
Gibutyag ni Miraluna Ceniza, ang nagbantay ni Jeric, ang apo sa magti-ayong Gestopa nga namatay sa maong sunog, nga lisod na nga maka-survive ang bata gumikan kay anaa ra gayud kini sulod sa kwarto sa dihang nahitabo ang sunog.
Matud pa nga grabi na ang ka-init sa kwarto ug baga na ang aso diin halos wala na’y makita sa sulod hinungdan nga iyaha kining gibunlot apan wala gayud mukuyog kaniya.
Gisaysay ni Ceniza nga iyaha kining gipugos nga manggawas na sila paingon sa exit, apan mibuhi kaniya si Jeric ug mibalik sa kwarto ug nagbukot ug habol.
Sigon pa nga gusto niini nga isalbar ang iyahang gibantayan apan naglisod gayud kini gumikan kay dili mu uban kaniya hinungdan nga sa dihang nagkabuhi-ay na sila sa kamot, mipadayon na lang gayud kini sa pagsalbar sa iyahang kaugalingon.
Gani, giingong naka-ihi na kini sa iyahang kakuyaw hinungdan nga bisan sa kataas, iyahang gilatay ang mga atop sa panimalay, ug milayat hinungdan nga nakaangkon kini ug samad-samad sa iyahang kalawasan.
Nagkanayon si Ceniza nga anaa pud kini mga gagmay pa nga mga anak diin mao gayud ang misulod sa iyahang hunahuna niadtong higayona hinungdan nga naningkamot kini nga makaluwas gikan sa nahitabong sunog.
