Dili mominos 27 ka mga balay ang naugdaw sa sunog nga miigo sa Sitio Kamagong, Barangay Lahug, dakbayan sa Sugbo, pasado alas 11 sa udto Domingo, Sept. 21, 2025.
Dali usab nga miresponde si Cebu City Mayor Nestor Archival sa Lahug, aron sutaon ang emergency response
Mokabat sa 44 ka pamilya o 93 ka mga indibidwal ang nawad-an og puy-anan sumala sa inisyal nga ihap sa Cebu City Department of Social Welfare and Services (DSWS).
Naapektuhan sa sunog ang 26 ka mga tag-iya sa panimalay, ug mokabat sa P1,500,000 ang gibana-bana nga nakadaot.
Matud sa kagamhanan sa siyudad nga ang mga namakwit nga pamilya makadawat og packed meals, family kits ug financial assistance, giandam usab ang mga dugang nga mga hinabang aron suportahan ang mga internal nga bakwit.
Sa pakighinabi sa Bombo Radyo Newsteam kang SFO 3 Wendell Villanueva, ang tigpamaba sa Cebu City Fire Office gipaambit niini ang usa sa mga nahimong hagit sa mga sakop sa kabomberohan sa ilang pagrespondi kay ang huot nga dalan ug ang mga biktima sa sunog kay anaa na usab sa daplin sa kadalanan nga maoy hinungdan naglisod og sulod ang mga fire trucks.
Gipaambit usab ni SFO 3 Villanueva nga aduna na silay gikonsiderar nga mga posibleng hinungdan apan anaa gihapon kini ubos sa imbistigasyon.
Sa laing bahin, laing sunog ang niulbo sa susamang oras sa residential area sa Sitio Ulingan, Barangay Inayawan ning susamang dakbayan.
Giisa sa first alarm ang sunog ug nakaapekto sa 10 ka mga balay diin 12 ka pamilya o 39 ka mga indibidwal ang nawad-an sa ilang puy-anan, sumala sa Cebu City Department of Social Welfare and Services.
