MANDAUE CITY-Muapelar si Dismissed Mandaue City Mayor Jonas Cortes sa Court of Appeals (CA) kabahin sa pagbasura sa buhatan sa Ombudsman atol sa kasong giatubang niini sa illegal nga pagtudlo ug usa ka opisyal sa kagamhanang dakbayan sa Mandaue.
Matod pa ni Cortes nga dili siya “satisfied” sa pagbasura sa motion of reconsideration niini sa resolution sa Ombudsman sa kasong administratiba sa pagtudlo niya kang Camilo Basaca Jr. isip Officer-in-Charge sa City Social Welfare Services (CSWS) sa Mandaue City Government niadtong tuig 2022 hinungdan sa iyang desisyon nga ipasaka kini sa CA.
Si Basaca gitudlo isip CSWS OIC niadtong Hulyo 2022 ug nakadawat lamang og permanenteng appointment isip community affairs officer IV niadtong Enero 2023.
Gitumbok pa ni Cortes ang lambigit nga kaso isip jurisprudence (Coyoca vs Gabriel Romualdez Quisumbing) nga naglambigit sa kanhi mayor sa samang dakbayan nga nagtudlo isip OIC-CSWS head nga “a person who is not eligible”.
Ang motion for reconsideration ni Cortes gibalibaran sa Ombudsman tungod sa kakuwang sa merito nga makagarantiya nga balihon ang kanhing desisyon nga nagbarog nga ilegal ang pagtudlo ni Cortes.
Gisuspenso sa anti-graft body niadtong Agosto si Cortes og usa ka tuig nga walay bayad tungod sa grave misconduct prejudicial to the best interest of the service.
Kahinumduman nga gawas sa nahisgutang kaso, nag-atubang sab si Cortes og lain reklamo kabahin sa illegal nga pagtugot sa Suprea Philippines Development Corp. diin usa ka cement-mix batching plant nga nag-operate sa Barangay Labogon niadtong 2020 hangtud 2022 nga walay business, sanitary, ug environmental permits.
