Adunay dakong kalamboan ang natad sa politika sa dakbayan sa Mandaue human kini nasayran nga si Dismissed Mayor Jonas Cortes ug iyang pundok nga Team Mandaue kay miduyog sa Proclaimation of Senatorial Candidates sa politikanhong partido nga Partido Demokratiko Pilipino (PDP) nga kanhi PDP-Laban.
Kini human adunay hulagway nga nigawas online nga ang mga kandidato sa mga lokal nga posisyon sa Metro Cebu Tri-cities nga gilangkoban sa dakbayan sa Sugbo, Mandaue, Lapu-Lapu kay anaa sa maong kalihokan nga gipangulohan mismo ni kanhi Presidente Rodrigo Duterte sa San Juan City niadtong Huwebes, Pebrero 13.
Gi-post kini online sa social media account sa Team Deretso ni kanhi Lapu-Lapu City Mayor Paz Radaza kinsa nangambisyon sab pagbalik sa gahum.
Sa maong post kay nagpakita kini sa slate sa Team Mandaue ni Cortes nga nag-posing uban sa Team Deretso ni Radaza ug Partido Barug ni Dismissed Cebu City Mayor Michael Rama.
Kahinumduman nga 10-ka buwan nga milabay kay si Cortes mibiya sa maong partido human mihawa pag-una ang pangu sa One Cebu Party nga si Cebu Provincial Governor Gwendolyn Garcia.
Ang partidong PDP kay nailhan sa kanhi pangan niini nga PDP-Lakas ng Bayan (Laban) apan nag-usab niadtong Abril 19, 2024 sa dihang giilog ni Duterte ang gahum sa pagpanguna sa partido gikan sa Senador Koko Pimentel, anak sa founder sa partido nga si kanhi Senate President Nene Pimentel.
Sa pagkakaron, wala pa mihatag sa iyang habig si Cortes o bisag kinsa man sa iyang pundok kabahin sa maong kalamboan kung timaan ba kini sa pagbalik niya sa maong partido.
