Gikatakdang mopasaka og kasong kriminal ug administratiba ang Department of Migrant Workers (DMW) batok kang kanhi Overseas Workers Welfare Administration (OWWA) Chief Arnel Ignacio.
Mao gihapon kini ang resulta sa anomalyang land acquisition deal ubos sa pamunoan ni Ignacio nga nasuta nga wala moagi sa saktong proseso ug walay saktong pagtugot.
Matud pa ni Migrant Workers Secretary Hans Leo Cacdac, dili lang si Ignacio ang manubag sa balaod kon dili lakip na ang uban pang OWWA Officers nga nalambigit sa maong transaksyon.
Sa laing bahin, kahinumdoman nga si Ignacio natangtang sa iyang katungdanan isip OWWA Chief tungod sa maong transaksyon ug tungod usab sa ‘loss of trust and confidence’ sa mga opisyal sa DMW ug Board of Trustees sa iyang pamunoan nga adunay unom ka kalapasan.///
Pipila sa mga kalapasan nga natala ubos sa pamunoan ni Ignacio naglakip sa dili awtorisadong paggamit sa P2.4 bilyones nga emergency repatriation funds nga gihimong capital outlay, ingon man ang pagpirma sa deed of sale sa yuta ug ang pagpadayon sa transaksyon nga walay board clearance.
Namatikdan usab nga ang acquisition deal naglambigit usab sa wala gibutyag nga mga kontrata sa pag-arkila, post-sale nga koleksyon sa abang, ug ang kapakyasan sa OWWA sa pagkuha sa hingpit nga pagpanag-iya sa napalit nga yuta bisan pa sa transaksyon hingpit nga nabayran.
Samtang nunot niini, nisaad ang kalihim nga ilang palig-unon ang pagpatuman sa transparency ug clean governance alang sa mas kasaligan nga serbisyo sa ilang buhatan ug mga kaabag nga ahensya alang sa mga Overseas Filipino Workers (OFW’s).
Gihatagan usab ug gibug-aton sa kalihim ang kamahinungdanon sa integridad ug transparency sa paghatag sa serbisyo publiko, labi na sa pagpanalipod sa pondo sa publiko.(Bombo Irene Ardiente)
