Gilunsad sa Department of Finance (DOF) ug sa Bureau of Internal Revenue (BIR) ang Taxpayer Portal alang sa mga narehistro ubos sa Large Taxpayers Service sa ilang nasudnong opisina sa Quezon City.
Diin ang bag-ong plataporma nagtumong sa paghimo sa pagdumala sa mga rekord sa buhis ug mga transaksyon sa dagkong mga negosyante nga mas sayon ug mas organisado.
Pinaagi sa portal, ang mga magbubuhis makakita sa ilang mga detalye sa pagparehistro, pagsubay sa mga tax return, pagsubay sa mga bayad, ug pagdawat og mga pahinumdom gikan sa sistema.
Sa iyang pakigpulong, gipasiugda ni Finance Secretary Frederick D. Go nga ang TP Portal magwagtang sa kalibog sa paggamit sa managlahing sistema ug maghatag og mas klaro nga pagtan-aw sa mga rekord sa buhis.
Gidayeg usab niya ang liderato sa BIR nga gipangulohan ni Commissioner Charlito Martin R. Mendoza sa pagtuman sa saad sa reporma ug digital transformation.
Sumala ni Commissioner Mendoza, ang TP Portal kabahin sa serye sa mga digital nga inisyatibo sa BIR karong tuiga, lakip ang Interactive Digital Tax Calendar, QR Code Verification System, ug Digital TIN sa eGovPH App. Dugang niya nga ang pilot implementation naka-focus sa dagkong mga magbubuhis aron mapaayo pa ang sistema sa dili pa kini palapdan.
Giisip sa DOF ug BIR ang paglusad isip usa ka dakong lakang padulong sa mas paspas, mas transparent, ug mas episyente nga gobyerno.
Kini nga milestone gilauman nga makapalambo sa pagsalig sa mga negosyante ug mga tigpamuhunan sa Pilipinas isip usa ka lig-on ug andam nga ekonomiya.
