Gikompirmar sa Department of Health (DOH)-7 nga misaka ngadto sa 16 ang mga patients under investigation o PUIs samtang 36 usab ang gipaubos sa monitoring sa rehiyon gumikan lang sa 2019 novel coronavirus acute respiratory disease o nCoV ARD.
Gitataw ni Dr. Jaime Bernadas, Regional Director sa DOH 7 nga sa maong ihap sa mga PUMs o patients under monitoring, tulo ang nagagikan sa Cebu, usa sa Bohol, duha sa Negros Oriental, 15 sa syudad sa Sugbo, 11 sa Mandaue City, ug upat sa dakbayan sa Lapu-Lapu.
Sigon pa sa regional director nga wala pa nila gikompirmar ang official breakdown sa nagkadaiyang lugar sa dise sais kabuok nga PUIs.
Kini human nga, matud pa, wala malakip sa opisyal nga ihap sa DOH Central Office ang upat ka mga PUIs sa Bohol gumikan lang sa giingong “backlog” niini.
Dugang pa ni Bernadas nga adunay verification process ang paghatag sa mga datos sa mga nataptan sa nCoV diin base lang kini sa gitagana nga criteria.
Gihimug-atan usab sa DOH-7 nga nagagikan lang sa ilang buhatan ang opisyal nga report kalabot na sa mga suspected cases sa 2019-nCoV ARD.
