Gipalig-on sa Department of Health Center for Health Development sa Central Visayas o DOH-7 ang kampanya batok dengue, samtang padayon nga misaka ang mga kaso sa rehiyon.
Gipadayon sa DOH-7 ang 4S strategy batok dengue, nga naglakip sa Search and Destroy, Self-Protection, Seek Early Consultation, ug Support Fogging/Misting kung gikinahanglan.
Ubos sa Search and Destroy, gipasiugda sa DOH-7 ang 4Ts campaign — Taob, Taktak, Tuyo ug Takip — aron mapugngan ang pagpamugaran sa mga lamok nga nagdala sa dengue.
Kini nagpasabot sa pagbaliktad sa mga sudlanan nga mahimong tigomanan sa tubig, pagtangtang sa stagnant water, pagpauga sa palibot, ug pagtabon sa mga sudlanan sa tubig.
Samtang, misaka ang mga kaso sa dengue sa Central Visayas, diin kumpara sa susamang panahon niadtong 2025, mas daghan ang natala nga kaso ning tuiga.
Sa pinakabag-ong datos nga gitaho sa Regional Epidemiology and Surveillance Unit o RESU-7, 3,268 nga dengue cases ang natala sa Cebu, apan wala pa kini gideklarar nga dengue outbreak, sa laing bahin, 2,217 ka kaso ug 20 ka kamatayon ang natala sa Bohol sukad Enero hangtod Agosto 29 ning tuiga.
Apan gipatin-aw sa RESU-7 nga dili lamang ang aktuwal nga gidaghanon sa kaso ang basehan sa pagdeklarar og outbreak.
Sa laing datos sa DOH-7 nga nagkumpara sa Enero hangtod Agosto 2026 ug sa susamang panahon niadtong 2025, usa ka porsyento ang pagsaka sa dengue cases sa tibuok Cebu Province, samtang sa mga highly urbanized cities, 50 porsyento ang pagsaka sa kaso sa Cebu City, 76 porsyento sa Mandaue City, ug 38 porsyento sa Lapu-Lapu City.
Matud ni Dr. Eugenia Mercedes Cañal ang Medical Officer IV sa Regional Epidemiology and Surveillance Unit o RESU-7, nga ang pagsaka sa mga kaso mahimo usab nga may kalabotan sa mas gipakusgang disease surveillance ug mas paspas nga detection sa dengue, ilabina tungod sa paggamit sa rapid diagnostic tests.
Bisan pa sa pagsaka sa mga kaso, gipatin-aw sa DOH-7 nga wala pa malapas sa epidemic threshold ang tibuok Central Visayas.
