Nagpasidaan ang Department of Health Central Visayas o DOH-7 batok sa risgo sa leptospirosis, ilabina sa mga lugar nga posibleng maapektuhan sa pagbaha, Sumala sa DOH-7, mamahimong makuha ang leptospirosis pinaagi sa exposure sa yuta o tubig nga kontaminado sa ihi sa mga hayop nga infected sa leptospira bacteria.
Sa pinakabag-ong datos sa DOH-7, 273 na ka kaso sa leptospirosis ang natala sa Central Visayas gikan Enero uno hangtod September 8, 2026, diin 18 niini ang namatay
Matud ni Dr. Eugenia Mercedes Cañal, Medical Officer IV sa Regional Epidemiology and Surveillance Unit o RESU-7, dili kinahanglan nga adunay samad ang usa ka tawo aron makasulod ang leptospira bacteria sa lawas.
Apan usa gihapon sa mga risk factors ang open wounds, ilabina kung ma-expose ang usa ka tawo sa muddy ug hugaw nga tubig, dugang pa ni Cañal, dili lamang ilaga ang mahimong source sa leptospira bacteria, apan apil usab ang ubang mga hayop sama sa iro ug baka.
Matud ni Cañal, mahimong makuha sa mga hayop ang bacteria pinaagi sa ilang exposure sa ubang infected nga mananap. Ug human marelease sa ilang ihi ang leptospira bacteria nga mahimong mokontamina sa yuta ug tubig.
Busa, pahimangno sa DOH-7 sa publiko nga likayan kutob sa mahimo ang paglusong sa baha ug pag-contact sa lapok o tubig nga posibleng kontaminado.
Siya nagkanayon nga mahimong makasulod ang bacteria pinaagi sa mucous membranes sama sa mata ug baba kung ma-splashan o ma-expose sa kontaminadong tubig o lapok.
Kung dili malikayan ang exposure, girekomendar sa DOH ang paggamit og protective footwear ug paghinlo dayon sa lawas human ma-expose sa baha o kontaminadong tubig.
Kung makasinati og mga sintomas human sa exposure, sama sa hilanat, sakit sa ulo ug lawas, pagsuka o pag-yellow sa panit ug mata, gidasig ang publiko nga magpakonsulta dayon sa health facility.
