Gibutyag ni Department of Health (DOH) Secretary Ted Herbosa nga nisaka ngadto sa 300 ang Super Health centers nga giila sa ahensya nga non-operational.
Subay sa pagtunga sa kalihim sa inter-agency coordination meeting uban sa Independent Commission for Infrastructure (ICI), si Herbosa niingon nga nagtuo siya nga nius-os ngadto sa 297 ang non-operational super health centers tungod kay ang uban niini nakaabli na apan matud niya nisaka kini ngadto sa 300.
Matod sa kalihim, kadaghanan sa mga non-operational super health centers naa sa Luzon tungod kay kini ang labing dako nga yuta.
Iyang gibanabana nga kapin sa 170 sa 300 ka super health centers ang naa sa Luzon samtang ang uban naa sa Visayas ug Mindanao.
Kalabot niini, ang kalihim nitudlo og mga regional director nga mosusi sa 300 pa ka mga super health centers nga wala magamit.
Base sa datos nga gipagawas sa DOH niadtong Oktubre 17, niabot na sa 878 ka super health centers ang napundo ubos sa Health Facility Enhancement Program sa tibuok nasod.
