CEBU CITY — Nisaka ngasto sa 25 ang ihap sa mga natakdan sa sakit nga coronavirus disease o COVID-19 sa Central Visayas.
Sa datos nga nahipos gikan sa Department of Health (DOH)-7, nag-una ang Cebu City nga adunay 18 ka mga kaso sa COVID-19 ug gisundan kini sa Lapu-Lapu City nga adunay duha ka mga kaso ug nagpabilin sa usa ang nagpositibo niini sa Mandaue City.
Samtang duha ang nagpositibo sa coronavirus sa Negros Oriental ug adunay tagsa ka mga kaso sa Bohol ug Cebu Province.
Gikan sa maong ihap, upat na ang natalang patay ug usa ang naayo niini.
Kagahapong adlawa, gi-release sa Vicente Sotto Memorial Medical Center (VSMMC) ang 43 ka mga test results gikan sa ilang labotoryo ug tulo kanila ang nagpositibo.
Duha niini ang nagagikan sa dakbayan sa Sugbo samtang gikan usab sa Lapu-Lapu City ang usa sa mga bag-ong kaso sa COVID-19.
Hinuon anaa sila sa stable nga kahimtang ug nagpaalim sa usa ka tambalanan.
Mitambag karon si Dr. Jaime Bernadas, ang regional director sa DOH-7, nga magpabiling kalmado ug mosanong gayud sa mga lakang nga gipatuman sa tagsa-tagsa ka mga local authorities.
