Gipahibalo sa Department of Health (DOH) nga ipatuman niini ang zero balance billing policy sa pinili nga mga tambalanan nga gipanag-iya sa local government unit (LGU), human gipahibalo ni President Ferdinand Marcos Jr. nga P1 bilyon gikan sa budget sa ahensya ang igahin alang sa programa.
Sumala sa DOH, gipasalig sa Presidente nga ang P1 bilyon nga pondo gikan sa DOH gamiton aron suportahan ang dagkong mga tambalanan sa LGU.
Kahinumduman nga ang zero balance billing policy gipatuman niadtong Mayo 18 sa miaging tuig, apan limitado lang kini sa mga pasyente sa basic o ward accommodation sa 87 ka mga ospital nga gidumala sa DOH.
Gipasabot ni Health Secretary Teodoro Herbosa nga ang P1 bilyon nga alokasyon dili igo aron malakip ang tanang ospital sa LGU, busa kinahanglan nga pilion kung unsang mga pasilidad ang makabenepisyo.
Miingon siya nga adunay 17 ka Level 3 nga mga ospital nga gipanag-iya sa LGU sa nasud. Kini nga mga ospital adunay mga serbisyo, sama sa intensive care units, nga “parehas kaayo” sa mga ospital sa DOH.
Gipasalig sa DOH nga ang pundo direktang moadto sa mga dagkong ospital sa LGU ug dili na kinahanglan ang ‘guarantee letter’ gikan sa mga politiko.
Gawas sa P1-bilyon nga alokasyon, giingon usab ni Herbosa nga ang bahin sa badyet sa programa sa DOH nga Medical Assistance to Indigent and Financially Incapacitated Patients (MAIFIP) magamit isip dugang nga pundo alang sa pagpatuman sa zero balance billing sa mga ospital sa LGU.
