CEBU CITY — Misaka ngadto sa 30 ang ihap sa mga nagpositibo sa coronavirus disease o COVID-19 sa Central Visayas human nadugangan og lima ka mga bag-ong kaso.
Sa report nga giluwatan sa Department of Health (DOH)-7, nag-una ang dakbayan sa Sugbo nga adunay 20 ka mga kaso, ug gisundan kini sa Lapu-Lapu City nga nagpabilin sa duha ka mga kaso, samtang usa pa ang COVID-infected case sa Mandaue City.
Anaa sa upat ang nataptan sa COVID-19 sa Negros Oriental samtang adunay duha sa lalawigan sa Sugbo ug usa sa Bohol.
Nadugangan og usa ang namatay sa COVID-19 gikan sa dakbayan sa Sugbo maong anaa na sa lima ang death toll niini.
Tambag karon ni DOH-7 Director Dr. Jaime Bernadas sa publiko nga ilakip sa pag-ampo ang mga medical frontliners, ingon man ang kaayuhan sa mga natakdan sa maong makamatay nga sakit.
