Gipanguluhan ni Department of Health (DOH) Secretary Teodoro “Ted” J. Herbosa ang paglunsad sa PhilHealth Regional Office-7 sa Guaranteed and Accessible Medications for Outpatient Treatment (GAMOT) Program, nga gipahigayon sa Kapitolyo sa Dakbayan sa Sugbo niadtong adlaw sa Martes, Pebrero 17, 2026.
Matod ni Secretary Herbosa, pinaagi sa GAMOT Program, dili na mahimong problema sa mga pasyente ang gastuhan sa dialysis ug pagpalit sa tambal, basta lig-on ang financing sa healthcare system.
Dugang pa, nga kauban sa programa ang YAKAP Program, nga nagpunting sa pagpalig-on sa primary care ug paghatag og libre nga essential, maintenance ug outpatient nga tambal sa mga benepisyaryo.//
Sumala sa PhilHealth Region VII, ang matag pasyente mahimong makabenepisyo og hangtod ₱20,000 matag tuig alang sa mga tambal nga sakop sa programa, lakip na ang tambal sa diabetes, hypertension ug nagkadaiyang impeksyon.
Kung kaniadto anaa lamang sa ₱2,500 ang coverage sa matag dialysis session, karon mosaka na kini sa ₱6,350 matag session.
Tungod niini, nagdugang na usab ang mga dialysis machine sa lain-laing dialysis centers aron matubag ang nagkadaghan nga pasyente.
Kapin sa 50 ka tambalanan sa Sugbo ang accredited sa PhilHealth diin mahimong makapakonsulta ang mga miyembro. Sa higayon nga marehistro ang pasyente sa YAKAP Program, mahimo na dayon kini mo-avail sa GAMOT Program ug makadawat og libre nga tambal pinaagi sa accredited pharmacies gamit ang ID system nga susama sa e-wallet.
Mitambong usab sa maong paglunsad ang mga representante sa provincial hospitals sa Sugbo, uban sa mga opisyal sa PhilHealth ug DOH aron masuta ug masiguro ang husto ug episyenteng implementasyon sa programa alang sa katawhan.
