Gipasakaan sa Department of Justice ang tulo ka industrial corporations tungod sa kapakyas sa pagbayad sa saktong buhis sa gobyerno.
Diin ang kaso may kalabotan sa Internal Revenue Code.
Matod sa DOJ, tulo ka dagkong korporasyon ang nagmagahi sa pagdumili sa pagbayad sa ilang buhis.
Giinsister sa ahensya nga dako og kita ang maong mga korporasyon, busa walay rason nga magdumili pagbayad og buhis.
Giila sa DOJ ang mga korporasyon nga Total Metal Corporation, nga nag-atubang sa 14 ka ihap sa kaso.
Gilambigit usab ang Equator Energy Corporation, nga adunay upat ka ihap sa kaso, samtang ang Limhuaco Metal Industrial Inc. nga adunay 12 ka ihap sa kaso.
Kalabot niini, nanghinaot si Justice Secretary Jesus Crispin Remulla nga moisyu dayon ang Court of Tax Appeals og arrest warrant alang sa mga tag-iya sa nahisgutang mga korporasyon.
